കേരളത്തിന്റെ സ്വാതന്ത്ര്യസമര ചരിത്രത്തിലെ ഏറ്റവും ത്യാഗോജ്ജ്വലമായ അധ്യായങ്ങളിലൊന്നാണ് വക്കം അബ്ദുൽ ഖാദറിന്റെ ജീവിതം. വെറും 26 വർഷം മാത്രം നീണ്ട ജീവിതം മാതൃരാജ്യത്തിന്റെ സ്വാതന്ത്ര്യത്തിനായി സമർപ്പിച്ച ധീരനായ യുവാവായിരുന്നു അദ്ദേഹം.
1917 മേയ് 25-ന് വക്കത്ത് വാവാക്കുഞ്ഞിന്റെയും ഉമ്മുസലുമ്മയുടെയും മകനായി ജനിച്ച മുഹമ്മദ് അബ്ദുൽ ഖാദർ നാലു മക്കളിൽ മൂത്തയാളായിരുന്നു. നെടുങ്ങണ്ട ശ്രീനാരായണ സ്കൂളിലായിരുന്നു വിദ്യാഭ്യാസം. വിദ്യാർത്ഥിയായിരിക്കെ തന്നെ ബ്രിട്ടീഷ് അനുകൂല ഭരണത്തിനെതിരായ പ്രതിഷേധങ്ങളിൽ സജീവമായി പങ്കെടുത്തു.
പിന്നീട് മലേഷ്യയിലെത്തിയ അദ്ദേഹം ഇന്ത്യൻ സ്വാതന്ത്ര്യത്തിനായുള്ള പ്രവർത്തനങ്ങളിൽ സജീവമായി. നേതാജി സുഭാഷ് ചന്ദ്രബോസിന്റെ നേതൃത്വത്തിലുള്ള ഇന്ത്യൻ നാഷണൽ ആർമിയിൽ (INA) ചേർന്നു. റേഡിയോ ആശയവിനിമയത്തിൽ പരിശീലനം നേടിയ അദ്ദേഹം ഇന്ത്യയിലേക്ക് രഹസ്യദൗത്യത്തിനായി തിരഞ്ഞെടുക്കപ്പെട്ടു.
1942-ൽ വക്കം ഖാദറിന്റെ നേതൃത്വത്തിലുള്ള സംഘം അന്തർവാഹിനിയിൽ ഇന്ത്യയിലേക്ക് പുറപ്പെട്ടു. കടലിനടിയിലൂടെയുള്ള ദുഷ്കരമായ യാത്രയ്ക്കൊടുവിൽ മലബാറിലെ താനൂർ തീരത്ത് എത്തിയെങ്കിലും ബ്രിട്ടീഷ് പോലീസിന്റെ പിടിയിലായി. തുടർന്ന് മദ്രാസിലേക്ക് കൊണ്ടുപോയി സൈനിക കോടതിയിൽ വിചാരണ ചെയ്യുകയും വധശിക്ഷ വിധിക്കുകയും ചെയ്തു.
ജയിൽവാസത്തിനിടയിൽ അനുഭവിച്ച കൊടിയ പീഡനങ്ങൾക്കിടയിലും അദ്ദേഹം തന്റെ ദേശസ്നേഹത്തിൽ നിന്ന് ഒരിക്കലും പിന്മാറിയില്ല. വധശിക്ഷയ്ക്ക് തൊട്ടുമുമ്പ് പിതാവ് വാവാക്കുഞ്ഞിനും ആത്മമിത്രമായ ബോണിഫേസിനും എഴുതിയ കത്തുകൾ അദ്ദേഹത്തിന്റെ അചഞ്ചലമായ മനസ്സിന്റെയും സ്വാതന്ത്ര്യബോധത്തിന്റെയും അപൂർവ രേഖകളാണ്.
1943 സെപ്റ്റംബർ 10-ന് പുലർച്ചെ മദ്രാസ് സെൻട്രൽ ജയിലിൽ വക്കം അബ്ദുൽ ഖാദർ, അനന്തൻ നായർ, സത്യേന്ദ്ര ചന്ദ്ര ബർദാൻ, ഫൗജാ സിംഗ് എന്നിവർ തൂക്കിലേറ്റപ്പെട്ടു. തനിക്കൊപ്പം ഒരു ഹിന്ദു സഹോദരനെയും തൂക്കിലേറ്റണമെന്നായിരുന്നു ഖാദറിന്റെ അന്ത്യാഭിലാഷം. അതനുസരിച്ച് അനന്തൻ നായരോടൊപ്പമാണ് അദ്ദേഹത്തെ തൂക്കിലേറ്റിയത്.
സ്വാതന്ത്ര്യത്തിനായി തന്റെ യൗവനം പോലും ബലിയർപ്പിച്ച ധീര ദേശാഭിമാനി വക്കം അബ്ദുൽ ഖാദർ — കേരളത്തിന്റെ അഭിമാനമായ രക്തസാക്ഷി.
അദ്ദേഹത്തിന്റെ അ ജ്വലിക്കുന്ന ഓർമ്മകൾക്ക് മുന്നിൽ ഹൃദയപൂർവ്വം സ്മരണാഞ്ജലികളോടെ ബിജുയുവശ്രീ.
2026-09-10