തിരുവനന്തപുരം:തിരുവനന്തപുരം കോർപ്പറേഷൻ പരിധിയിലുള്ള വിവിധ ഹോട്ടലുകളിലും ഭക്ഷണശാലകളിലും കോർപ്പറേഷൻ ആരോഗ്യ വിഭാഗത്തിന്റെ നേതൃത്വത്തിൽ വ്യാപക മിന്നൽ പരിശോധനകൾ നടന്നു. പൊതുജനങ്ങളുടെ ആരോഗ്യം സംരക്ഷിക്കുന്നതിനും ഭക്ഷണശാലകളിൽ ആവശ്യമായ ശുചിത്വ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തുന്നതിനുമായി നടത്തുന്ന പ്രവർത്തനങ്ങളുടെ ഭാഗമായാണ് ഈ പരിശോധനകൾ നടപ്പിലാക്കിയത്. പരിശോധനയിൽ കണ്ടെത്തിയ ഗുരുതരമായ വീഴ്ചകളെക്കുറിച്ചും സ്വീകരിച്ച തുടർ നടപടികളെക്കുറിച്ചും തിരുവനന്തപുരം കോർപ്പറേഷൻ വിശദീകരിച്ചു.
വിവിധ കേന്ദ്രങ്ങളിൽ നടത്തിയ പരിശോധനയിൽ മനുഷ്യശരീരത്തിന് അത്യന്തം ഹാനികരമായ രീതിയിൽ സൂക്ഷിച്ചിരുന്ന പഴകിയതും ശുചിത്വരഹിതവുമായ ഭക്ഷണസാധനങ്ങൾ വൻതോതിൽ കണ്ടെത്തി നശിപ്പിക്കുകയുണ്ടായി.
ദിവസങ്ങൾ പഴക്കമുള്ള മാംസവിഭവങ്ങൾ, വീണ്ടും ഉപയോഗിച്ച എണ്ണകൾ, ശുചിത്വ രഹിത സാഹചര്യങ്ങളിൽ പാകം ചെയ്ത ഭക്ഷണങ്ങൾ എന്നിവയാണ് പ്രധാനമായും പിടിച്ചെടുത്തത്. അടിസ്ഥാന ശുചിത്വ മാനദണ്ഡങ്ങൾ പാലിക്കാതെയും കൃത്യമായ മാനദണ്ഡങ്ങളില്ലാതെയും പ്രവർത്തിച്ച ഭക്ഷണശാലകൾക്കെതിരെ ഉടനടി പിഴ ചുമത്തുകയും ആവശ്യമായ നോട്ടീസുകൾ നൽകുകയും ചെയ്തിട്ടുണ്ട്.
ഭക്ഷണശാലകളുടെ പാചകപ്പുരകളിലെ വൃത്തി, ഭക്ഷണവും കുടിവെള്ളവും തയ്യാറാക്കാൻ ഉപയോഗിക്കുന്ന വെള്ളത്തിന്റെ ശുദ്ധി, പാചകക്കാരുടെയും ജീവനക്കാരുടെയും ഹെൽത്ത് കാർഡുകൾ എന്നിവ നിർബന്ധമായും ഉറപ്പാക്കാൻ തിരുവനന്തപുരം കോർപ്പറേഷൻ എല്ലാ ഹോട്ടൽ ഉടമകൾക്കും കടുത്ത നിർദ്ദേശം നൽകിയിട്ടുണ്ട്. ആവശ്യമായ നിബന്ധനകൾ പാലിക്കാതെയും ഉപഭോക്താക്കളുടെ ആരോഗ്യം അപകടത്തിലാക്കുന്ന രീതിയിലും പ്രവർത്തിക്കുന്ന സ്ഥാപനങ്ങൾക്ക് യാതൊരുവിധ ഇളവുകളും നൽകില്ലെന്നും യോഗത്തിൽ വ്യക്തമാക്കി.
വീണ്ടും ഇത്തരം ഗുരുതരമായ നിയമലംഘനങ്ങൾ ആവർത്തിക്കുന്ന സ്ഥാപനങ്ങളുടെ ലൈസൻസ് റദ്ദാക്കുന്നതും സ്ഥാപനങ്ങൾ അടച്ചുപൂട്ടിക്കുന്നതും ഉൾപ്പെടെയുള്ള കടുത്ത നിയമനടപടികൾ തിരുവനന്തപുരം കോർപ്പറേഷൻ കൈക്കൊള്ളും. പൊതുജനാരോഗ്യ സംരക്ഷണം ഉറപ്പാക്കാൻ വരും ദിവസങ്ങളിലും തിരുവനന്തപുരം കോർപ്പറേഷന്റെ പ്രത്യേക ആരോഗ്യ സ്ക്വാഡുകളുടെ നേതൃത്വത്തിൽ നഗരത്തിന്റെ എല്ലാ മേഖലകളിലും മിന്നൽ പരിശോധനകൾ കൂടുതൽ ശക്തമായി തുടരുമെന്നും തിരുവനന്തപുരം കോർപ്പറേഷൻ അറിയിച്ചു.