“ഇന്ത്യയുടെ സ്വാതന്ത്ര്യസമര ചരിത്രത്തിലും ഭരണഘടനാ നിർമ്മാണ ചരിത്രത്തിലും കേരളത്തിന്റെ രാഷ്ട്രീയ ചരിത്രത്തിലും ഒരിക്കലും വിസ്മരിക്കാനാവാത്ത പേരാണ് ആനി മസ്ക്രീൻ. ഇന്ത്യൻ ഭരണഘടനയിൽ ഒപ്പുവെച്ച മലയാളികളിൽ ഒരാളും, തിരു-കൊച്ചിയിൽനിന്ന് ലോക്സഭയിലെത്തിയ ആദ്യ വനിതയും, തിരുവിതാംകൂർ-കൊച്ചി സംസ്ഥാനത്തെ ആദ്യ വനിതാ മന്ത്രിയും ആയ അവർ രാജ്യസേവനത്തിനും ജനാധിപത്യത്തിനും സ്ത്രീശാക്തീകരണത്തിനും ജീവിതം സമർപ്പിച്ച മഹനീയ വ്യക്തിത്വമായിരുന്നു.
1902 ജൂൺ 6-ന് തിരുവനന്തപുരം വഴുതക്കാട്ട് ഗബ്രിയേൽ മസ്ക്രീന്റെയും മറിയത്തിന്റെയും മകളായാണ് ആനി മസ്ക്രീൻ ജനിച്ചത്. തിരുവനന്തപുരം സണ്ണി മെയ്ഡ്സ് സ്കൂൾ, ഹോളി ഏയ്ഞ്ചൽസ് സ്കൂൾ, ഗവൺമെന്റ് വിമൻസ് കോളേജ്, മഹാരാജാസ് കോളേജ് (ഇന്നത്തെ യൂണിവേഴ്സിറ്റി കോളേജ്), ഗവൺമെന്റ് ലോ കോളേജ് എന്നിവിടങ്ങളിലായിരുന്നു വിദ്യാഭ്യാസം. ചരിത്രത്തിലും സാമ്പത്തികശാസ്ത്രത്തിലും എം.എ. ബിരുദങ്ങളും നിയമബിരുദവും നേടിയ അവർ 1925–26-ൽ സിലോണിലെ കാൻഡിയിലെ സംഗമിത്ര കോളേജിൽ അധ്യാപികയായി സേവനമനുഷ്ഠിച്ച ശേഷം നാട്ടിലെത്തി തിരുവനന്തപുരം വഞ്ചിയൂർ കോടതിയിൽ അഭിഭാഷകയായി പ്രാക്ടീസ് ആരംഭിച്ചു.
1932-ൽ തിരുവനന്തപുരം ലത്തീൻ ക്രിസ്ത്യൻ മഹാജനസഭയുടെ സെക്രട്ടറിയായി തിരഞ്ഞെടുക്കപ്പെട്ട അവർ പിന്നാക്കവിഭാഗങ്ങളുടെ വിദ്യാഭ്യാസത്തിനും സാമൂഹിക പുരോഗതിക്കും സ്ത്രീശാക്തീകരണത്തിനും വേണ്ടി ശ്രദ്ധേയമായി പ്രവർത്തിച്ചു. ലത്തീൻ ക്രിസ്ത്യൻ സമൂഹത്തെ സാമൂഹികവും രാഷ്ട്രീയവുമായ മുഖ്യധാരയിലേക്ക് ഉയർത്തിക്കൊണ്ടുവരുന്നതിൽ അവർ നിർണായക പങ്കുവഹിച്ചു.
1938-ലെ ഇന്ത്യൻ നാഷണൽ കോൺഗ്രസിന്റെ ഹരിപ്പുര സമ്മേളനത്തിൽ പങ്കെടുത്തത് അവരുടെ രാഷ്ട്രീയജീവിതത്തിലെ വഴിത്തിരിവായി. തുടർന്ന് തിരുവിതാംകൂർ സ്റ്റേറ്റ് കോൺഗ്രസിന്റെ രൂപീകരണത്തിൽ സജീവ പങ്കുവഹിക്കുകയും പ്രവർത്തകസമിതി അംഗമായും സെക്രട്ടറിയായും പ്രവർത്തിക്കുകയും ചെയ്തു. ഉത്തരവാദിത്തഭരണത്തിനും ജനാധിപത്യത്തിനുമായി നടന്ന സമരങ്ങളിൽ അവർ മുൻനിര പോരാളിയായി മാറി.
1938 നവംബർ 13-ന് സ്റ്റേറ്റ് കോൺഗ്രസ് നിരോധിക്കപ്പെട്ടതിനെതിരെ ആരംഭിച്ച സത്യാഗ്രഹത്തിൽ പങ്കെടുത്ത് അറസ്റ്റിലായ അവർ എട്ടുമാസം തടവുശിക്ഷ അനുഭവിച്ചു. 1941-ൽ വീണ്ടും അറസ്റ്റിലായി ഏഴുമാസവും, 1942 ഓഗസ്റ്റ് 30-ന് വീണ്ടും അറസ്റ്റിലായി രണ്ടുവർഷവും, 1945 ജനുവരി 21-ന് വീണ്ടും അറസ്റ്റിലായി മൂന്നുമാസവും ജയിലിൽ കഴിയേണ്ടിവന്നു. 1939 മുതൽ 1947 വരെ സ്വാതന്ത്ര്യസമരത്തിന്റെ ഭാഗമായി നിരവധി തവണ തടവുശിക്ഷ അനുഭവിച്ച അവർ കേരളത്തിലെ വനിതാ സ്വാതന്ത്ര്യസമര സേനാനികളുടെ മുൻനിരയിൽ സ്ഥാനം നേടി.
1946-ൽ ഇന്ത്യൻ ഭരണഘടനാ നിർമ്മാണസഭയിലേക്ക് തിരഞ്ഞെടുക്കപ്പെട്ട ആനി മസ്ക്രീൻ ഭരണഘടന രൂപീകരണ പ്രവർത്തനങ്ങളിൽ സജീവമായി പങ്കെടുത്തു. ജനാധിപത്യം, മൗലികാവകാശങ്ങൾ, സ്ത്രീസമത്വം, സാമൂഹികനീതി എന്നിവയെക്കുറിച്ചുള്ള ചർച്ചകളിൽ അവർ ശ്രദ്ധേയമായ ഇടപെടലുകൾ നടത്തി. 1950 ജനുവരി 24-ന് ഇന്ത്യൻ ഭരണഘടനയിൽ ഒപ്പുവെച്ച മലയാളികളിൽ ഒരാളായി അവർ ചരിത്രത്തിൽ ഇടം നേടി. അവരുടെ ഒപ്പ് ഒരു വ്യക്തിയുടെ പേരുമാത്രമല്ല; സ്വാതന്ത്ര്യസമരത്തിന്റെ ത്യാഗത്തിന്റെയും ഇന്ത്യൻ ജനാധിപത്യത്തിന്റെ അടിത്തറ പാകിയ തലമുറയുടെയും ശാശ്വതസാക്ഷ്യമാണ്.
1948-ൽ തിരുവനന്തപുരം (ഒന്ന്) നിയോജകമണ്ഡലത്തിൽ നിന്ന് എതിരില്ലാതെ തിരുവിതാംകൂർ നിയമസഭയിലേക്ക് തിരഞ്ഞെടുക്കപ്പെട്ട അവർ 1949 ജൂലൈ 5-ന് തിരുവിതാംകൂർ-കൊച്ചി സംസ്ഥാന മന്ത്രിസഭയിൽ ആരോഗ്യ-വൈദ്യുതി മന്ത്രിയായി ചുമതലയേറ്റു. പൊതുജനാരോഗ്യം, വൈദ്യുതിവികസനം, ഭരണപരിഷ്കാരങ്ങൾ എന്നിവയ്ക്ക് അവർ പ്രത്യേക പ്രാധാന്യം നൽകി. അഭിപ്രായവ്യത്യാസങ്ങളെ തുടർന്ന് 1950 ജനുവരിയിൽ മന്ത്രിസ്ഥാനം രാജിവെച്ചെങ്കിലും പൊതുപ്രവർത്തനത്തിൽ നിന്ന് അവർ ഒരിക്കലും പിന്മാറിയില്ല.
1952-ലെ ആദ്യ പൊതുതെരഞ്ഞെടുപ്പിൽ തിരുവനന്തപുരം ലോക്സഭാ മണ്ഡലത്തിൽ നിന്ന് കമ്മ്യൂണിസ്റ്റ് പാർട്ടിയുടെ പിന്തുണയോടെ സ്വതന്ത്ര സ്ഥാനാർഥിയായി മത്സരിച്ച അവർ സോഷ്യലിസ്റ്റ് പാർട്ടിയുടെ ടി. കെ. നാരായണപിള്ളയെ പരാജയപ്പെടുത്തി ലോക്സഭാംഗമായി. തിരു-കൊച്ചിയിൽ നിന്ന് ലോക്സഭയിലെത്തിയ ആദ്യ വനിത എന്ന ചരിത്രനേട്ടവും അവർ സ്വന്തമാക്കി. സ്വതന്ത്ര ഇന്ത്യയുടെ ആദ്യ ലോക്സഭയിലെ അംഗമെന്ന നിലയിൽ ജനങ്ങളുടെ പ്രശ്നങ്ങൾ ധൈര്യത്തോടെയും വ്യക്തതയോടെയും പാർലമെന്റിൽ അവതരിപ്പിച്ച ശ്രദ്ധേയ പാർലമെന്റേറിയനായിരുന്നു അവർ.
1957-ലെ ലോക്സഭാ തിരഞ്ഞെടുപ്പിൽ തിരുവനന്തപുരം മണ്ഡലത്തിൽ നടന്ന ത്രികോണ മത്സരത്തിൽ കമ്മ്യൂണിസ്റ്റ് പാർട്ടിയുടെ എസ്. ഈശ്വര അയ്യർ വിജയിച്ചു. പി.എസ്.പി.യുടെ പട്ടം താണുപിള്ള രണ്ടാം സ്ഥാനവും സ്വതന്ത്ര സ്ഥാനാർഥിയായ ആനി മസ്ക്രീൻ മൂന്നാം സ്ഥാനവും നേടി. ഈതെരഞ്ഞെടുപ്പ് പരാജയത്തിന് ശേഷം അവർ സജീവ രാഷ്ട്രീയത്തിൽ നിന്ന് പിന്മാറിയെങ്കിലും പൊതുപ്രവർത്തനത്തിലും സാമൂഹികസേവന രംഗത്തും സജീവമായി തുടർന്നു.
ആനി മസ്ക്രീന്റെ വ്യക്തിത്വത്തിന്റെ മുഖമുദ്ര സത്യസന്ധതയും ലാളിത്യവും ആദർശനിഷ്ഠയുമായിരുന്നു. അധികാരത്തേക്കാളും സ്ഥാനമാനങ്ങളേക്കാളും രാഷ്ട്രസേവനത്തിനും സാമൂഹികനീതിക്കും അവർ പ്രാധാന്യം നൽകി. സ്ത്രീകൾക്ക് രാഷ്ട്രീയത്തിലും പൊതുജീവിതത്തിലും ആത്മവിശ്വാസത്തോടെയും ധൈര്യത്തോടെയും മുന്നേറാൻ അവർ നൽകിയ പ്രചോദനം ഇന്നും തലമുറകളെ വഴിനടത്തുന്നു.
1963 ജൂലൈ 19-ന് തിരുവനന്തപുരം ജനറൽ ആശുപത്രിയിൽ ആനി മസ്ക്രീൻ അന്തരിച്ചു. സ്വാതന്ത്ര്യസമര സേനാനി, ഭരണഘടനാ നിർമ്മാണസഭാംഗം, തിരു-കൊച്ചിയിലെ ആദ്യ വനിതാ മന്ത്രി, തിരു-കൊച്ചിയിലെആദ്യ വനിതാ ലോക്സഭാംഗം എന്നീ നിലകളിൽ അവർ രാജ്യത്തിന് നൽകിയ സംഭാവനകൾ ഇന്ത്യൻ ജനാധിപത്യ ചരിത്രത്തിലെ തിളക്കമാർന്ന അധ്യായങ്ങളാണ്. കാലം മായ്ക്കാത്ത ആ സേവനപാരമ്പര്യത്തിന് മുന്നിൽ ആദരപൂർവം പ്രണാമം.