തിരുവനന്തപുരം: സ്ഥിരതയാർന്ന പ്രവർത്തനം കാഴ്ചവയ്ക്കുന്നതിനായി കെ.എസ്.ആർ.ടി.സി. നടത്തിയ മുന്നൊരുക്കങ്ങളും പരിഷ്കരണങ്ങളും കൃത്യമായി ഫലവത്തായി എന്നതിന്റെ തെളിവായി, ഓണക്കാല സർവീസ് ക്രമീകരണത്തിനിടെ ഒരു ദിവസത്തെ ഏറ്റവും ഉയർന്ന ടിക്കറ്റ് വരുമാനം കോർപ്പറേഷൻ രേഖപ്പെടുത്തി. 2026 ഓഗസ്റ്റ് 31 തിങ്കളാഴ്ചത്തെ ആകെ കളക്ഷൻ 1081.82 ലക്ഷം രൂപ (10.82 കോടി രൂപ) ആണ്.കഴിഞ്ഞ വർഷത്തെ ഇതേ ഓണക്കാല തിങ്കളാഴ്ചയായ 08.09.2025 ലെ കളക്ഷൻ 1019.20 ലക്ഷം രൂപ (10.19 കോടി രൂപ) ആയിരുന്നു. ഇതിനെ അപേക്ഷിച്ച് 62.62 ലക്ഷം രൂപയുടെ, അതായത് 6.14 ശതമാനത്തിന്റെ വർധനവാണ് ഈ വർഷം ഉണ്ടായിരിക്കുന്നത്.
വരുമാന കാര്യക്ഷമതയിലും ഈ പുരോഗതി പ്രതിഫലിക്കുന്നു. ഒരു ബസിൽ നിന്നുള്ള ശരാശരി വരുമാനം (EPB) 23,477 രൂപയായി ഉയർന്നു; കഴിഞ്ഞ വർഷം ഇതേ ദിവസം ഇത് 22,123 രൂപയായിരുന്നു. ഒരു കിലോമീറ്ററിൽ നിന്നുള്ള വരുമാനം (EPKM) 69.09 രൂപയായി; കഴിഞ്ഞ വർഷം ഇത് 64.89 രൂപയായിരുന്നു. അതായത്, ഓരോ ബസും ഓരോ കിലോമീറ്ററും കൂടുതൽ ഫലപ്രദമായി വരുമാനം നേടി.
അന്നേ ദിവസം 4,641 ബസുകൾ സർവീസ് നടത്തി; 4,461 ഷെഡ്യൂളുകൾ ഓപ്പറേറ്റ് ചെയ്തു. കഴിഞ്ഞ വർഷം ഇതേ ദിവസം ഇത് യഥാക്രമം 4,528 ബസുകളും 4,417 ഷെഡ്യൂളുകളുമായിരുന്നു.
ഓണക്കാലത്തെ ഉയർന്ന യാത്രാ ആവശ്യകത മുൻകൂട്ടി കണ്ട് ക്രമീകരിച്ച അധിക സർവീസുകളും സ്പെഷ്യൽ സർവീസുകളും, ഷെഡ്യൂൾ പാലനത്തിലെ കൃത്യതയും, ഡിജിറ്റൽ സംവിധാനങ്ങളിലൂടെ യൂണിറ്റുകൾക്ക് ലഭ്യമായ തത്സമയ നിരീക്ഷണ സൗകര്യവുമാണ് ഈ നേട്ടത്തിന് വഴിയൊരുക്കിയത്. ഓണാഘോഷത്തിനു ശേഷമുള്ള മടക്കയാത്രാ തിരക്ക് പൂർണമായി പ്രയോജനപ്പെടുത്താൻ കോർപ്പറേഷന് കഴിഞ്ഞു.ജീവനക്കാരുടെ ക്ഷേമകാര്യങ്ങളിലും, ശമ്പളവും അലവൻസുകളും ഉൾപ്പെടെയുള്ള ആനുകൂല്യങ്ങൾ യഥാസമയം വിതരണം ചെയ്യുന്നതിലും ബഹുമാനപ്പെട്ട മുഖ്യമന്ത്രിയും ബഹു:ഗതാഗത വകുപ്പ് മന്ത്രിയും സമയോജിതമായി നടത്തിയ പ്രവർത്തങ്ങൾ ജീവനക്കാർക്ക് നൽകിയ ആത്മവിശ്വാസം ഈ മികച്ച പ്രവർത്തന ഫലത്തിന് പിന്നിലുണ്ട്
കെ.എസ്.ആർ.ടി.സി.യുടെ അഭിമാനകരമായ ഈ നേട്ടത്തിനായി സമർപ്പിതമായി പ്രവർത്തിച്ച മുഴുവൻ ജീവനക്കാരോടും, കോർപ്പറേഷനിൽ വിശ്വാസമർപ്പിച്ച യാത്രക്കാരോടും, പിന്തുണ നൽകിയ ഓരോരുത്തരോടും കെ.എസ്.ആർ.ടി.സി.യുടെ പേരിൽ നന്ദി അറിയിക്കുന്നതായി ചെയർമാൻ & മാനേജിംഗ് ഡയറക്ടർ അഭിപ്രായപ്പെട്ടു.