തിരുവനന്തപുരം: കവടിയാർ സാൽവേഷൻ ആർമി ഹയർ സെക്കൻഡറി സ്കൂളിലെ എൻ.എസ്.എസ്–റേഞ്ചർ യൂണിറ്റിന്റെ ആഭിമുഖ്യത്തിൽ ശ്രീരാമകൃഷ്ണ മിഷൻ ആശുപത്രിയുടെയും ലോക മെഡിസിറ്റിയുടെയും സഹകരണത്തോടെ രക്തദാന ക്യാമ്പും മെഡിക്കൽ ക്യാമ്പും സംഘടിപ്പിക്കുന്നു. നവംബർ 11 ബുധനാഴ്ച രാവിലെ 9 മുതൽ ഉച്ചയ്ക്ക് 1 വരെ സ്കൂൾ ഓഡിറ്റോറിയത്തിലാണ് ക്യാമ്പ് നടക്കുന്നത്.
മെഡിക്കൽ ക്യാമ്പിൽ ജനറൽ മെഡിസിൻ, ന്യൂറോളജി, ഓർത്തോപീഡിക്സ് എന്നീ വിഭാഗങ്ങളിലെ വിദഗ്ധ ഡോക്ടർമാരുടെ സേവനം ലഭ്യമാകും. കൂടാതെ രക്തസമ്മർദം, രക്തത്തിലെ പഞ്ചസാരയുടെ അളവ് (GRBS), ശരീരഭാരം, പൾസ് എന്നിവ പരിശോധിക്കുന്നതിനുള്ള സൗകര്യവും മെഡിക്കൽ സംഘം ഒരുക്കിയിട്ടുണ്ട്.
രക്തദാനത്തിന്റെ മഹത്വം പൊതുസമൂഹത്തിലേക്ക് എത്തിക്കുന്നതിനും ജീവൻ രക്ഷിക്കാനുള്ള സന്നദ്ധത വളർത്തുന്നതിനുമാണ് ക്യാമ്പ് സംഘടിപ്പിക്കുന്നത്. രക്തദാനത്തിൽ താൽപര്യമുള്ളവരും മെഡിക്കൽ സേവനം പ്രയോജനപ്പെടുത്താൻ ആഗ്രഹിക്കുന്നവരും ക്യാമ്പിൽ പങ്കെടുത്ത് ഈ സന്നദ്ധ പ്രവർത്തനത്തിന്റെ ഭാഗമാകണമെന്ന് സംഘാടകർ അഭ്യർഥിച്ചു.