ഡൽഹി :രാജ്ഭവനെ അവഹേളിക്കുന്ന സമീപനമാണ് മന്ത്രി വി.ശിവന്കുട്ടിയില് നിന്നുണ്ടായതെന്ന് വി.മുരളീധരൻ. പ്രോട്ടോക്കോള് തെറ്റിച്ച മന്ത്രി അതിന് വിശദീകരണം നല്കണം. നിലമ്പൂരില് ഉപതിരഞ്ഞെടുപ്പ് നടക്കുമ്പോള് ദേശീയഗാനത്തെയടക്കം അപമാനിച്ച ശിവന്കുട്ടിയുടെ ലക്ഷ്യം വോട്ട്ബാങ്ക് രാഷ്ട്രീയമാണ്. ഇന്ത്യൻ സ്വാതന്ത്ര്യ സമരകാലത്തെ സങ്കൽപ്പമാണ് ഭാരതാംബ. ഹമാസിന്റെ കൂടി അടയാളമായ കഫിയ അണിഞ്ഞ് പ്രകടനം നടത്തുന്നവർക്ക് ഭാരതാംബയുടെ ചിത്രത്തോടുള്ള അസഹിഷ്ണുത അംഗീകരിക്കാനാവില്ലെന്നും മുന്കേന്ദ്രമന്ത്രി പറഞ്ഞു.
ആര്എസ്എസിന് ഇന്ഡിസഖ്യത്തിന്റെ ഔദാര്യം വേണ്ട: വി.മുരളീധരൻ
നിലമ്പൂർ ഉപതെരഞ്ഞെടുപ്പിൽ ജനകീയ വിഷയങ്ങൾ ചർച്ചയാകാതിരിക്കാനാണ് ആർഎസ്എസിനെച്ചൊല്ലി വിവാദമുണ്ടാക്കുന്നതെന്ന് മുൻകേന്ദ്രമന്ത്രി വി.മുരളീധരൻ. മണ്ഡലത്തില് ചെയ്തിട്ടുള്ള വികസനത്തെക്കുറിച്ച് ഇൻഡി സഖ്യക്കാർക്ക് വോട്ടർമാരോട് പറയാനുണ്ടായിരുന്നില്ല. അതുകൊണ്ടാണ് ആര്എസ്എസിനെ വിവാദത്തിലേക്ക് വലിച്ചിഴയ്ക്കുന്നത്.
ആർഎസ്എസ് എന്തെന്ന് ജനങ്ങൾക്ക് അറിയാം. സിപിഎമ്മുമായി ഒരു ബാന്ധവും ആർഎസ്എസിനുണ്ടായിട്ടില്ല. അടിയന്തരാവസ്ഥക്കാലത്ത് ജനാധിപത്യസംരക്ഷണത്തിന് ആർഎസ്എസ് നിരവധി പ്രവർത്തനങ്ങൾ നടത്തിയിട്ടുണ്ട്. അത് സിപിഎമ്മുമായുള്ള സഹകരണമല്ല. വാടിക്കൽ രാമകൃഷ്ണൻ മുതൽ രൺജിത്ത് ശ്രീനിവാസൻ വരെയുള്ള സംഘപ്രവർത്തകരുടെ ചോരക്കറ പേറുന്നവരാണ് സിപിഎമ്മുകാരെന്നും വി.മുരളീധരൻ പറഞ്ഞു.