ജോർജുകുട്ടി തിരിച്ചെത്തുന്നു; ‘ദൃശ്യം-3’ മെയ് 21-ന് തിയേറ്ററുകളിൽ; മോഹൻലാലിന്റെ ജന്മദിനത്തിൽ ബിഗ് റിലീസ്
ആരാധകർ ഏറെ ആകാംക്ഷയോടെ കാത്തിരിക്കുന്ന ചിത്രം ലാലേട്ടന്റെ ജന്മദിന സമ്മാനമായാണ് പ്രേക്ഷകരിലേക്ക് എത്തുന്നത്
കൊച്ചി: മലയാള സിനിമയിലെ എക്കാലത്തെയും വലിയ ഹിറ്റ് പരമ്പരയായ ‘ദൃശ്യ’ത്തിന്റെ മൂന്നാം ഭാഗം റിലീസിനൊരുങ്ങുന്നു. ജീത്തു ജോസഫ് രചനയും സംവിധാനവും നിർവ്വഹിക്കുന്ന ‘ദൃശ്യം-3’ മെയ് 21-ന് ആഗോളതലത്തിൽ പ്രദർശനത്തിനെത്തും.
“ഭൂതകാലം ഒരിക്കലും നിശബ്ദമായിരിക്കില്ല, അത് കാത്തിരിക്കുക മാത്രമേ ചെയ്യൂ…” എന്ന കുറിപ്പോടെ മോഹൻലാൽ തന്നെയാണ് സോഷ്യൽ മീഡിയയിലൂടെ ചിത്രത്തിന്റെ പുതിയ പോസ്റ്റർ പങ്കുവെച്ചത്. ആരാധകർ ഏറെ ആകാംക്ഷയോടെ കാത്തിരിക്കുന്ന ചിത്രം ലാലേട്ടന്റെ ജന്മദിന സമ്മാനമായാണ് പ്രേക്ഷകരിലേക്ക് എത്തുന്നത്.
ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമ്മിക്കുന്നത്. ജീത്തു ജോസഫ് തന്നെയാണ് മൂന്നാം ഭാഗത്തിന്റെയും അമരക്കാരൻ. മോഹൻലാലിനൊപ്പം മീന, അൻസിബ ഹസ്സൻ, എസ്തർ അനിൽ എന്നിവർ ജോർജുകുട്ടിയുടെ കുടുംബമായി വീണ്ടും സ്ക്രീനിലെത്തും.
കഴിഞ്ഞ ഡിസംബർ ആദ്യവാരത്തോടെ ചിത്രത്തിന്റെ ഷൂട്ടിംഗ് പൂർത്തിയായിരുന്നു. നിലവിൽ പോസ്റ്റ് പ്രൊഡക്ഷൻ ജോലികൾ പുരോഗമിക്കുകയാണ്. ആദ്യം വിഷു-ഈസ്റ്റർ റിലീസായി ഏപ്രിൽ 2-ന് ചിത്രം തിയേറ്ററുകളിലെത്തിക്കാനായിരുന്നു തീരുമാനിച്ചിരുന്നത്. എന്നാൽ, സാങ്കേതികമായ കാരണങ്ങളാലോ കൂടുതൽ മികച്ച രീതിയിൽ ചിത്രം ഒരുക്കുന്നതിനായോ റിലീസ് മെയ് മാസത്തിലേക്ക് മാറ്റുകയായിരുന്നു. റിലീസ് മാറ്റാനുള്ള ഔദ്യോഗിക കാരണം നിർമ്മാതാക്കൾ വെളിപ്പെടുത്തിയിട്ടില്ലെങ്കിലും, ലാലേട്ടന്റെ ജന്മദിനത്തിൽ തന്നെ ചിത്രം വരുന്നത് വലിയ ആഘോഷമാകുമെന്ന പ്രതീക്ഷയിലാണ് സിനിമാ ലോകം.